Bagong 'PBB' season, hindi sa Pilipinas gaganapin

ABS-CBN News

Posted at Jul 05 2016 07:55 PM

MANILA - Sa kauna-unahang pagkakataon ay hindi sa Pilipinas titira ang mga bagong housemates ng "Pinoy Big Brother."

Sina McCoy de Leon, Nikko Natividad, Yassi Pressman, Jinri Park at Juan Karlos Labajo ang mga celebrities na unang makakatikim ng out-of-the-country experience.

Ayon kay Direk Laurenti Dyogi, bagong viewing experience rin ito para sa mga manonood. "Sa tagal na natin sa ere eh medyo nakabisado na ng mga viewers, ng ating housemates [ang Bahay ni Kuya]," aniya ni Dyogi.

Sa Vietnam titira ang housemates. Paliwanag ni Dyogi: "Gusto rin natin ng isang lugar na kahit sa history natin ay may relationship ...There were Vietnamese refugees in Palawan and marami tayong similarities tulad na lang sa prutas at sa temparatura."

Kaninang umaga ay bumiyahe na ang mga celebrity housemates sa airport habang naka-blindfold, hood at earphones. Maingat at organisado ang pag-escort at bawal silang lapitan.

Isa-isa silang dumaan sa immigration pero sa hindi inaasahan na pagkakataon ay nagkaroon ng problema. Na-hold at hindi pinayagang makalipad sina Park, Labajo, at isa pang hunk housemate dahil sa problema sa visa at immigration cards.

Walang ideya ang mga housemates kung saan sila pupunta. Matapos ang two-hour flight ay nakarating na ang mga housemates sa Ho Chi Minh City, Vietnam.

Nakapasok na sa loob ng "Big Brother" house sina De Leon, Pressman at Natividad at kinikilatis na nila ang kanilang titirahang bahay sa mga susunod na linggo. Ayon kay Dyogi, siyam ang magiging housemates ng pinakabagong celebrity edition.

Ngunit puwede pa rin itong magbago depende kung makakasunod sina Labajo, Park at ang isang hunk housemate.

Bisitahin ang Patrol.PH para sa iba pang mga balita.