‘Huwag mawalan ng pag-asa’: Sharon Cuneta, may panawagan sa gitna ng krisis

ABS-CBN News

Posted at Mar 25 2020 11:56 AM

 
 
 
 
 
 
 
 
 
 
 
 
 
 
 

A post shared by ActorSingerPresenter (@reallysharoncuneta) on

MAYNILA — Pinaalalahanan ni Sharon Cuneta ang kanyang mga tagasunod na manatiling positibo dahil lahat ng pagsubok ay may katapusan.

“Sa nangyayari sa mundo ngayon at mahirap man tumingin sa positibo o kahit magkaroon ng pag-asa, kailangan natin gawin at magkaroon ng mga ito upang ngumiti at huwag na huwag papayag mawalan ng pag-asa mula sa ating paggising hanggang sa pagtulog. Darating din ang umaga uli para sa ating lahat. Matatapos din ito. Pilipino tayo, madami nang pinagdaanang malulupit na panahon dulot ng bagyo, baha, lindol, bulkan, at kung ano-ano pa,” ani Sharon sa Instagram post niya ngayong Miyerkoles.

“Siguro masyado nang mabilis ang ating mundo. Baka nakalimutan na natin ang tunay na mahahalaga sa buhay. Karamihan sa atin, bukod sa ating mga kababayan na araw-araw kailangan magtrabaho para may maiuwing pagkain sa kanilang mga minamahal na pamilya, ay di nakakakita na halos lahat pala ng kailangan natin ay nasa atin na. Nakalimutan lang natin makuntento. Higit sa lahat, nakalimutan na siguro nating tumawag sa Panginoon kahit wala tayong problema o kinakailangan. Nagpapaalala lang ang ating Ama. Kapit lang. Magtulungan tayo. Walang iwanan,” ani Sharon na iginiit din ang pagbibigay ng tulong sa mga nangangailangan lalo na sa frontliners.

“Tumulong tayo sa mga walang paraang makakuha ng makakain sa araw-araw, sa mga frontliners. 'Di rin naman nila kagustuhang dumami pa ang magkasakit at ma-expose ang mga doktor at healthcare workers sa posibilidad na mahawa. Gaya ng mga pulis at sundalo sa mga kalye. Sa init at gutom at takot na mahawa, 'di rin naman nila gusto 'yon. Kung kaya natin, abutan na lang sana natin sila ng maiinom, makakain, at magsabi ng ‘Thank you po sa ginagawa ninyo.’ 'Yun lang po. Ingat po kayong lahat. If you don’t have to go out, stay home and take advantage of this time with your family and don’t forget time for yourself. Pray. May God bless us all! Love and tight hugs from all of us at our home,” ani Sharon.

Bisitahin ang Patrol.PH para sa iba pang mga balita.