PatrolPH

‘ASAP’: Cebuano rapper may handog na kanta para sa mga Pinay

ABS-CBN News

Posted at Mar 08 2020 02:02 PM

Watch more News on iWantTFC

MAYNILA — Patok sa mga Pilipino kamakailan ang mga kantang nagpapahayag ng paghanga sa ganda ng mga Pinay, mula sa “Dalaga” ng grupong Allmo$t hanggang sa “Catriona” ni Matthiaos. 

Ngayon’y may bago na namang awitin tungkol sa pagkabilib sa mga Pilipina – ang “Pinay na Sobrang Fine” ng Cebuano rapper na si Kyle Zagado.

Sobrang fine sa netizens ng kanta ni Zagado kaya marami ang nag-upload sa social media ng mga dance cover nito.

Sa panayam ng “ASAP,” ikinuwento ni Zagado na na-inspire siya ng ibang local artists, gaya ng Allmo$t, na gumawa ng sariling kanta.

“Naisip ko ‘yong kanta na ‘Pinay na Sobrang Fine’ with the help of my friend... gusto ko kasi talaga ‘yong women empowerment,” ani Zagado sa “ASAP.”

“Tisay, morena, matangkad, petite, payat, at chubby – As long as you’re confidently beautiful with a heart, isa kang Pinay na sobrang fine,” ani Zagado.

Kinanta ni Zagado ang “Pinay na Sobrang Fine” sa “ASAP” stage kasama si Darren Espanto habang nagsilbi namang dancers sa performance sina Joao Constancia, Ken San Jose, at Jeremy Glinoga.

Bisitahin ang Patrol.PH para sa iba pang mga balita.