PatrolPH

Gerald Anderson nabiktima ng 'bukas-kotse'; mga suspek nahuli

ABS-CBN News

Posted at Feb 14 2022 01:49 PM | Updated as of Feb 14 2022 07:50 PM

Nakuhanan ng CCTV ang pagnakaw ng mga suspek mula sa sasakyan ng aktor na si Gerald Anderson, na nakaparada sa may Roces Avenue, Quezon City.
Nakuhanan ng CCTV ang pagnakaw ng mga suspek mula sa sasakyan ng aktor na si Gerald Anderson, na nakaparada sa may Roces Avenue, Quezon City.

(UPDATE) Nahuli na ng mga awtoridad ang 3 suspek na dawit sa pagnanakaw umano sa sasakyan ng aktor na si Gerald Anderson.

Sa kuha ng CCTV sa insidente noong Enero 31, mapapanood na binasag ng mga suspek ang bintana ng kotse ni Anderson habang nakaparada ito sa tapat ng isang gym sa Roces Avenue, Quezon City.

Kasama sa mga nakuha kay Anderson ang kaniyang wallet, relo, ilang alahas, pasaporte, credit card, mga ID at gadgets.

Pero natunton umano ng National Bureau of Investigation (NBI) ang isang suspek matapos niyang buksan ang laptop ni Anderson at nag-transfer ng P50,000 sa sariling account mula sa crypto wallet ng aktor.

Sa pagkakahuli sa kasabwat, sumuko sa NBI ang 2 pang suspek.

Sinabi ng isa sa mga suspek na hindi umano nila alam na kotse ng aktor ang pinagnakawan hanggang sa nakita ang ID nito.

Watch more News on iWantTFC

Ayon kay Anderson, hindi niya nagustuhan na kabilang sa mga nanakaw sa kaniya ang mga dokumentong naglalaman ng kaniyang mga personal na impormasyon.

"Ang sama ng pakiramdam na 'yon eh. Parang 'yong information mo, credit card... just like that nawala. It's the worst [feeling]," anang aktor.

Natutunan na umano ni Anderson na huwag nang mag-iwan ng mga mahahalagang gamit sa sasakyan, kahit pa tinted ito.

"I want to make this an awareness para sa lahat ng tao na huwag talagang mag-iwan ng bag sa loob ng kotse nila," aniya.

Ayon sa NBI, taga-Tondo, Maynila ang grupo at dumayo pa sa Quezon City para makapambiktima.

Ikinulong ang mga suspek sa kasong pagnanakaw pero nabatid ding may nauna na silang kaso na may kinalaman sa droga at baril.

— Ulat ni Niko Baua, ABS-CBN News

Bisitahin ang Patrol.PH para sa iba pang mga balita.