PatrolPH

DOLE, may emergency employment sa mga lugar na apektado ng Bagyong Odette

Zen Hernandez, ABS-CBN News

Posted at Dec 23 2021 03:10 PM | Updated as of Dec 23 2021 08:35 PM

Watch more News on iWantTFC

MAYNILA (UPDATE) — Nagpapatupad ang Department of Labor and Employment (DOLE) ng emergency employment para sa mga informal worker sa mga lugar na matinding naapektuhan ng Bagyong Odette, sabi ngayong Huwebes ng isang opisyal ng ahensiya.

Ayon kay Karen Trayvilla ng DOLE-Bureau of Workers with Special Concerns, nasa 25,000 manggagawa sa Calabarzon, Western Visayas, Central Visayas, Eastern Visayas, Northern Mindanao at Caraga ang makikinabang sa programa.

Sinimulan na aniya ng Eastern Visayas ang kanilang emergency employment noong Disyembre 17 habang Disyembre 20 naman ito nag-umpisa sa Northern Mindanao.

Pagtatrabahuhin ang mga benepisyaryo sa rehabilitation at recovery effort kaugnay ng Odette. Tutulong umano sila sa pag-repack ng relief goods at clearing operations sa mga kalsada.

Maaaring tumagal ng 10 hanggang 90 araw ang employment, sabi ni Trayvilla.

"Pag-deliver po ng mga relief goods, repacking ng relief goods. Puwede din ho tayong tumagal ng 45 days, pagsasaayos naman po ng mga baradong kanal, paglilinis ng kapaligiran pagkatapos ng kalamidad. At puwede tumagal ng 90 days para makatulong tayo doon sa pag-aayos ng mga daan," paliwanag ni Trayvilla.

Nasa P100 milyon ang inilaang pondo para sa programa.

May hiwalay na ayuda ang DOLE para sa mga manggagawa sa formal sector pero naubusan umano ito ng pondo. 

Kaya ayon kay Labor Secretary Silvestre Bello IIII, tatanggapin na rin ang formal workers sa Tulong Panghanapbuhay sa Ating Disadvantaged/Displaced Workers (TUPAD) program ng ahensiya.

Ayon din kay Bello, P20 bilyon ang ilalaan ng DOLE para sa emergency employment sa susunod na taon.

Sa huling tala ng National Disaster Risk Reduction and Management Council, umakyat na sa 258 ang bilang ng mga nasawi sa pananalasa ng Odette noong nakaraang linggo.
 

RELATED VIDEO

Watch more News on iWantTFC
Bisitahin ang Patrol.PH para sa iba pang mga balita.