2 klase ng asukal ng SM Bonus 'di rehistrado'; mga produkto tanggal muna sa merkado

ABS-CBN News

Posted at Oct 28 2020 02:32 PM | Updated as of Oct 28 2020 08:15 PM

Kabilang ang SM Bonus Refined Sugar at SM Bonus Brown Sugar sa mga produktong 'di rehistrado sa Food and Drug Administration, ayon sa abisong inilabas noong Oktubre 22. Retrato mula sa Facebook page ng FDA

MAYNILA - Nagbabala ang Food and Drug Administration sa publiko laban sa pagbili at pagkonsumo ng asukal ng SM Bonus at iba pang mga 'di rehistradong produkto— dahilan para alisin ng SM Markets ang mga asukal sa kanilang mga tindahan.

Sa memorandum circular na inilabas noong Oktubre 22, kinumpirma ng FDA na hindi rehistrado at walang certificate of product registration ang brown at refined sugar ng SM Bonus, maging ang mga sumusunod na produkto. 

  • Melvan Ginger Brew With Turmeric And Lemongrass
  • Sweet Valley Freeze Dried Cranberry Coated With Milk Chocolate
  • Lorenzo Farm Dark Chocolate

Dahil dito, hindi raw matitiyak ng FDA ang kalidad at kaligtasan ng produkto. 

"The FDA verified through post-marketing surveillance that the abovementioned food products are not registered and no Certificates of Product Registration (CPR) have been issued," anila sa pahayag. 

Watch more in iWantTFC

Nagbabala rin sila sa mga establisimyento laban sa pag-advertise, pag-distribute, at pagbenta ng nasabing produkto. 

"We always remind merchants to please remember na lahat po ng pagkain, basta processed, ay kailangan pong i-rehistro sa FDA," ani FDA Director-General Eric Domingo. 

Ayon naman sa SM Markets, aalisin muna nila sa mga tindahan ang mga naturang asukal habang kinukumpleto pa ng kanilang supplier ang requirements ng FDA. 

"We are pulling out SM Bonus Sugar products mentioned in the FDA circular advisory No. 2020-1927 until such time that our supplier is able to meet FDA registration requirements," anila sa pahayag. 

Sinubukan din ng ABS-CBN News na kuhanin ang pahayag ng Sweet Valley Freeze Dried Cranberry Coated With Milk Chocolate at Lorenzo Farm Dark Chocolate pero wala pa silang tugon.

Siniguro rin ni Domingo na magiging mabilis ang pagproseso ng mga requirements. 

-- Ulat ni Zandro Ochona, ABS-CBN News

Bisitahin ang Patrol.PH para sa iba pang mga balita.