Mga employer 'kailangan magbigay' ng 13th month pay: DOLE

ABS-CBN News

Posted at Oct 15 2020 02:12 PM | Updated as of Oct 15 2020 08:08 PM

Ilang mamimili ang tumitingin ng Christmas decorations sa Quezon City noong Setyembre 20, 2020. Mark Demayo, ABS-CBN News

MAYNILA (UPDATE) — Kailangang magbigay ang mga kompanya ng 13th month pay sa kanilang mga manggagawa, ayon sa Department of Labor and Employment (DOLE).

Sa Laging Handa briefing, sinabi ni Labor Secretary Silvestre Bello III na hindi puwedeng ipagpaliban ang pagbibigay ng 13th month pay at hindi rin puwedeng magkaroon ng exemptions.

Watch more in iWantTFC

"We will not postpone, we will not defer and we will not give any exemptions to the payment of the 13th month pay," ani Bello.

Magugunitang una nang umapela ang mga distressed company o mga lugi na kompanya at maliliit na negosyo na hindi muna magbigay ng 13th month pay.

Ayon kay Bello, required pa ring magbigay ang mga distressed company pero humahanap ng paraan ang gobyerno para matulungan ang mga ito.

Magsusumite ang DOLE sa Department of Finance ng proposal hinggil sa posibleng subsidiya sa mga distressed company.

Sa Biyernes inaasahang maglalabas ng department order ang DOLE para ilatag ang guidelines sa pagbabayad ng 13th month pay ngayong taon.

Ikinatuwa ng Defend Jobs Philippines ang pasya ng DOLE pero iginiit na problema pa rin ang gutom at kakulangan ng trabaho.

"Kailangang gumawa ng paraan ang kasalukuyang gobyerno para resolbahin ang problemang ito," ani Defend Job Philippines spokesperson Christian Lloyd Magsoy.

"Kailangang suportahan ang mga micro, small at medium enterprises para makapaglikha ng trabaho sa mga Pilipinong walang trabaho," ani Magsoy.

Naniniwala naman ang grupong Sentro na mababalewala ang utos na magbigay ng 13th month pay kung hindi matutulungan ng gobyerno ang mga maliliit na negosyo.

Nanawagan naman ang Kilusang Mayo Uno sa gobyerno na maglaan ng pondo para sa ayuda sa mga mangaggawa at maliliit na negosyo.

Umapela naman ang Employers Confederation of the Philippines ng pautang mula sa gobyerno.

"'Yong walang ibabayad, hindi mo mapipilit... Hindi mo kayang pigain ang bato, paduguin ang bato kung talagang walang magagawa. So kung gusto mo, tulungan natin," ani ECOP President Sergio Luis Ortiz.

Naghikahos ang ilang kompanya at negosyo sa Pilipinas bunsod ng mga community quarantine restriction na ipinatupad dahil sa banta ng COVID-19.

-- Ulat nina Joyce Balancio at Zen Hernandez, ABS-CBN News

Bisitahin ang Patrol.PH para sa iba pang mga balita.