ALAMIN: Full 'contactless' na pagbayad sa mga toll plaza sisimulan na sa Nobyembre 2

ABS-CBN News

Posted at Sep 11 2020 04:04 PM | Updated as of Sep 11 2020 08:36 PM

Watch more in iWantTFC

MAYNILA - Hinikayat ang mga motorista na magpakabit na ng RFID sticker na kailangan para sa "cashless toll payment" bago ito ipatupad para sa lahat ng mga dadaang sasakyan sa mga toll plaza pagdating ng Nobyembre 2. 

Unang inhayag ng toll companies na kailangan nang ipakabit ang Radio Frequency Identification (RFID) system, sa harap ng pagdami ng mga toll teller o mga nagbabantay ng mga toll na nahawahan na ng coronavirus disease 2019 (COVID-19). 

Magagamit ang mga sticker sa North Luzon Expressway, Cavite-Laguna Expressway, C5 Link, Subic - Clark - Tarlac Expressway, at Manila–Cavite Expressway. 

Nasa P200 hanggang P500 ang halaga ng RFID na magsisilbing "load," na hindi nag-e-expire, ayon sa pinuno ng Easytrip na si Eugene Antonio. 

Maaaring makuha ito sa mga toll plaza at mga convenience stores. Maaari rin mabili online ang load.

Kapag RFID na ang gamit, 3 segundo lang ang itatagal ng transaksyon sa kada toll booth. 

Hamon ngayon sa mga toll operator kung paano mahihimok ang mga motorista na magpakabit ng mga RFID Sticker lalo’t inaasahan na dadagsa muli ang mga motorista sa mga toll plaza pagdating ng Undas, ayon kay Antonio. 

Magtatalaga ang toll operators ng ground personnel sa mga toll booth para tulungan ang mga motoristang hindi pa nakakabili ng RFID sticker. 

Siniguro rin ng mga operator na hindi mawawalan ng trabaho ang mga teller lalo na’t marami pang proyekto ang kompanya ang nakapila at mangangailangan ng dagdag na personnel. 

— Ulat ni Jacque Manabat, ABS-CBN News

Bisitahin ang Patrol.PH para sa iba pang mga balita.