Singil sa kuryente ng Meralco bababa sa Setyembre

ABS-CBN News

Posted at Sep 09 2020 11:55 AM | Updated as of Sep 09 2020 06:05 PM

Ayon sa Meralco, aabot sa P0.0623 kada kilowatt hour ang magiging bawas-singil sa kuryente ngayong buwan. ABS-CBN News 

MANILA (UPDATE) - Magkakaroon ng bawas-singil sa kuryente ang Meralco ngayong Setyembre.

Ayon sa pinakamalaking power distributor sa bansa, aabot sa P0.0623 kada kilowatt hour (kWh) ang bawas sa singil sa kuryente para sa September bill. 

Katumbas ito ng P12 na bawas sa mga residential customers may 200 kWh na konsumo kada buwan, P19 sa mga kumokonsumo ng 300 kWh, P25 sa mga kumokonsumo ng 400 kWh, at P31 sa mga kumokonsumo ng 500 kWh. 

Ito na ang ikalimang buwan na nagkaroon ng bawas-singil ang electricity provider. 

Iyon lang, sumipa na ang presyo ng kuryente sa spot market sa unang linggo ng Setyembre na puwedeng magpataas sa singil sa bill sa Oktubre. 

Ayon din sa Meralco, manananatili ang deadline sa katapusan ng Oktubre patra bayaran lahat ng naipong bayarin sa kuryente. 

"Parang merong indications na with the resumption of the GCQ and
with tumaas nang konti 'yung demand for power tapos nasabayan ng power plant outages, tumaas ang spot market charges," ani Larry Fernandez, Utility Economics Head ng Meralco. 

Nangako rin ang Meralco na magiging maluwag sila kung hindi talaga kayang magbayad ng customer. 

Magdedesisyon din ang Meralco kung palalawigin pa ang deadline pero kung hindi ay maaari raw makiusap sa kanilang tanggapan.  -- Ulat ni Alvin Elchico, ABS-CBN News

Bisitahin ang Patrol.PH para sa iba pang mga balita.