PatrolPH

Pamilyang may 5 miyembro, kailangan ng P12,030 para sa pangunahing pangangailangan

ABS-CBN News

Posted at Aug 15 2022 02:06 PM | Updated as of Aug 15 2022 07:13 PM

Palengke sa Quezon City noong Hulyo 19, 2022. George Calvelo, ABS-CBN News
Palengke sa Quezon City noong Hulyo 19, 2022. George Calvelo, ABS-CBN News

Kailangan ng pamilyang Pinoy na may 5 miyembro ng P12,030 kada buwan para mapunan ang mga pangunahing pangangailangan, sabi ngayong Lunes ng Philippine Statistics Authority (PSA).

Sa isang press briefing, lumabas na tumaas ang poverty threshold sa P12,030 para sa taong 2021. Noong 2018, nasa P10,756 lang ito.

Ang poverty threshold ay tumutukoy sa halagang kailangan ng pamilya kada buwan para sa kanilang pangunahing pangangailangan.

Nauna nang ipinaliwanag ng PSA na kasama rito ang gastusin sa pagkain, damit, pabahay, tubig, kalusugan, transportasyon, komunikasyon, at edukasyon.

Kung pagbabasehan ang mga rehiyon, ang National Capital Region ang may pinakamataas na poverty threshold na P13,741, kompara sa P11,951 noong 2018.

Watch more News on iWantTFC

Sa parehong briefing, sinabi ng PSA na pumalo sa halos 20 milyon ang bilang ng mga mahihirap na Pinoy noong nakaraang taon sa harap ng pagtaas sa 18.1 porsiyento ng 2021 poverty incidence.

Ito'y mas mataas sa 16.7 porsiyentong poverty incidence sa nakaraang survey noong 2018, na katumbas ng 17.7 milyong mahihirap na Pinoy.

Naitala ang pinakamataas na poverty incidence sa Bangsamoro region.

Ayon kay Socioeconomic Planning Secretary Arsenio Balisacan, ang pagtaas ng poverty rate ay nagpapakita ng epekto sa suweldo at trabaho ng limitadong kilos dahil sa COVID-19 pandemic.

Target ng administrasyon ni Pangulong Ferdinand Marcos Jr. na maibaba ang poverty incidence sa single digit pagsapit ng 2028.

— May ulat ni Warren de Guzman, ABS-CBN News

Watch more News on iWantTFC
Bisitahin ang Patrol.PH para sa iba pang mga balita.