(UPDATE) Tumaas ang presyo ng ilang klase ng gulay sa Metro Manila bunsod umano ng kakulangan ng supply.
Kabilang dito ang sibuyas, na paunti-unti ang pagde-deliver sa mga pamilihan sa Kamaynilaan.
Sa puwesto ng tindera ng gulay na si Norma Santos, pumalo na sa P220 ang kada kilo ng puting sibuyas mula P190.
"Kaunti lang po ang dumadating siguro tinatantiya kasi mahal. Bawal din kasi ang imported," ani Santos.
Ayon sa Samahang Industriya ng Agrikultura (Sinag), ubos na ang lokal na produksyon ng puting sibuyas kaya tumataas ang presyo nito.
Kaya iminumungkahi ng group ang pag-angkat nito lalo't may mga report na may ipinupuslit umanong puting sibuyas papuntang Luzon.
"Sa ngayon kasi 'yong storage kasi ng sibuyas na puti, up to this month, wala nang masyadong stocks talaga kaya puwede naman mag-issue ulit ng import permit para at least makapasok 'yong white na sibuyas," ani Sinag Chairperson Rosendo So.
"May mga naririnig kaming smuggled na pumapasok. So dapat matukoy kung saan 'yong pumapasok na smuggled. Galing south eh. Galing Mindanao, dinadala dito sa Luzon," ani So.
Bukod sa sibuyas, tumaas din ang presyo ng carrots.
Sa Trabajo Market sa Maynila, halimbawa, nasa P100 na ang kada kilo ng carrots mula P80 hanggang P90 noong nakaraang linggo.
Bagaman naantala ang pagbiyahe ng mga gulay mula Benguet noong nakaraang linggo dahil sa lindol, sinabi ng Department of Agriculture (DA) na normal na ngayon ang dating supply ng gulay sa Metro Manila mula norte.
Inaalam na rin ng DA ang dahilan ng doble hanggang tripleng patong sa presyo ng gulay sa mga pamilihan kahit mababa ang farm gate price ng mga magsasaka sa Benguet trading post.
"From the time sa trading post bago po makarating sa Metro Manila, ang dami na pong pinagdaanan na traders ng ating gulay. Siyempre magpapatong sila nang magpapatong hanggang sa makarating sa ating tindera," paliwanag ni Agriculture Undersecretary Kristine Evangelista.
"'Yong pag-ayos po ng value chain, we want it to minimize the layers of traders," aniya.
Kabilang sa mga plano ni Pangulong Ferdinand Marcos Jr. sa agrikultura ang pag-aayos ng value chian para mapababa ang presyo ng mga produkto pagdating sa mga konsumer.
RELATED VIDEO
Bisitahin ang
Patrol.PH para sa iba pang mga balita.