PatrolPH

P1 dagdag-pasahe, kulang pero malaking tulong na rin: transport groups

ABS-CBN News

Posted at Jun 09 2022 02:03 PM | Updated as of Jun 09 2022 07:22 PM

Watch more News on iWantTFC

(UPDATE) Kulang pero makakatulong na rin ang P1 dagdag sa minimum na pasahe sa mga jeep sa Metro Manila at ilang karatig-lalawigan, sabi ngayong Huwebes ng ilang transport groups.

Inanunsiyo noong gabi ng Miyerkoles ng Land Transportation Franchising and Regulatory Board (LTFRB) na pumayag ito sa P1 provisional fare increase para sa mga jeep sa Metro Manila, Central Luzon, Calabarzon at Mimaropa. Ibig sabihin, P10 na ang base fare o pamasahe sa naturang mga lugar. 

Ayon kay Vigor Mendoza, pangulo ng 1-United Transport Alliance Koalisyon (Utak), ang inaprubahang dagdag-pasahe ay katumbas ng P300 hanggang P400 dagdag na kita kada araw para sa mga tsuper, pero sana'y mataasan pa ito.

"Salamat din naman. Better than nothing," ani Mendoza sa panayam ng Teleradyo.

"Kahit paano makakatulong pero alam niyo naman, 'yong hinahabol nating presyo ang layo na. So hindi pa rin sapat. Sana mabigay 'yong P2 [increase] para dagdag-tulong na rin nila," dagdag niya.

Kulang pero malaking tulong na rin ang dagdag-pasahe para sa Federation of Jeepney Operators and Drivers Association of the Philippines (Fejodap).

Ayon kay Fejodap President Ricardo Rebaño, umaasa siyang kahit papaano ay magpatuloy sa pamamasada ang mga tsuper na nagbabalak nang tumigil at humanap ng ibang mapagkakakitaan.

Dapat din aniyang pag-aralan muli kung paano makakahirit ng panibagong umento, lalo't nakaamba na namang tumaas ang presyo ng produktong petrolyo.

Para hindi umano maapektuhan ang mga commuter, iminungkahi ni Rebaño na pag-aralan ng gobyerno ang oil subsidy o pagbawas sa excise tax sa langis.

Para naman kay Pasang Masda President Obet Martin, sapat sa kanilang grupo ang P12 minimum fare.

Marami na aniya sa kanilang mga miyembro ang tumigil sa pamamasada kaya gumagawa sila ng mga paraan para hindi maapektuhan ang serbisyo sa publiko.

Noong Marso, tinanggihan ng LTFRB ang hiling ng mga transport group na P1 dagdag-singil pero kumambiyo dahil sa tila walang prenong pagtaas sa presyo ng petrolyo.

"Humihingi tayo ng understanding sa riding public. Really, hirap na hirap na hirap na hirap na rin ang mga kababayan na operators and riders," ani LTFRB Executive Director Ma. Kristina Cassion.

Pero hindi pa tapos ang laban ng mga transport group dahil may hiling pa silang P4 hanggang P6 dagdag sa base fare, na didinggin sa Hunyo 28. Ibig sabihin, P15 ang nais nilang pasahe imbes na P10.

Nilinaw naman ng LTFRB na pansamantala lang ang dagdag-singil at kapag bumalik sa P40 hanggang P50 ang kada litro ng diesel at gasolina ay ibabalik sa P9 ang minimum fare.

Sa ibang rehiyon, manananatili naman ang P9 minimum fare dahil wala umanong inihaing petisyon sa LTFRB doon.

— May ulat nina Jacque Manabat at Anna Cerezo, ABS-CBN News

RELATED VIDEO

Watch more News on iWantTFC
 
Bisitahin ang Patrol.PH para sa iba pang mga balita.