Meralco may dagdag-singil sa May bill

ABS-CBN News

Posted at May 07 2021 01:32 PM | Updated as of May 07 2021 06:33 PM

MAYNILA— Magtataas ng singil ang Meralco para sa bill ngayong Mayo, anunsiyo ng power distributor. 


 
Ito na ang ika-2 sunod na buwan na nagkaroon ng taas-singil ang power distributor. 

Ayon sa Meralco, tataas ng P0.185 kada kilowatt hour sa billing ng Mayo. 

Paliwanag nila, ito ay dahil natapos na ang refund sa over-recovered charges. Bukod pa ito sa kaunting pagtaas sa generation charge. 

Katumbas ang taas-singil ng P37 na dagdag sa mga residential customers na may 200 kWh na konsumo kada buwan, P55 dagdag sa mga kumokonsumo ng 300 kWh, P73 sa mga kumokonsumo ng 400 kWh, at P90 sa mga kumokonsumo ng 500 kWh. 

Maaalalang nagkaroon ng taas-singil ang power distributor noong Abril, bunsod ng pagtaas ng generation charge. 

Sa ngayon ay nagsuspinde ng disconnection ang Meralco sa mga lugar na apektado ng modified enhanced community quarantine - partikular na sa mga sineserbisyuhan sa National Capital Region (NCR) Plus (Metro Manila, Rizal, Bulacan, Cavite at Laguna).

Samantala, pumalo na sa pinakamataas na lebel ang konsumo ng kuryente sa Luzon dahil sa tindi ng init. 

Sumipa pa ang presyo ng kuryente sa spot market simula Mayo 4, na maaaring magpalobo ulit ng singil sa Hunyo. 

Para sa grupong Laban Konsyumer, "insensitive" na sabihan ang consumers na magbayad dahil nagsisikap naman silang kumayod para makabayad. 

Panukala nila, palawigin ang "no disconnection policy" ng Meralco. 

"[Give] additional period. Maybe another 2 weeks makaka-adjust siya. Give him sufficient lead time, maganda naman ang paying habit ng consumer kung may pera 'yan,” ani Laban Konsyumer president Victor Dimagiba. 

Sagot ng Meralco, pag-aaralan nila ang hirit ni Dimagiba. Pero sa ngayon, hanggang Mayo 14 lang suspendido ang putulan ng kuryente. 

— Ulat ni Alvin Elchico, ABS-CBN News

 KAUGNAY NA BALITA: 

Watch more in iWantTFC
 
Bisitahin ang Patrol.PH para sa iba pang mga balita.