PatrolPH

Singil sa kuryente tataas sa Marso: Meralco

ABS-CBN News

Posted at Mar 10 2022 11:36 AM | Updated as of Mar 10 2022 08:27 PM

Watch more News on iWantTFC

MAYNILA (UPDATE) — Magkakaroon ng pagtaas sa singil sa kuryente ang Manila Electric Company (Meralco) ngayong Marso, sabi ngayong Huwebes ng kompanya.

Ayon sa Meralco, P0.063 kada kilowatt hour (kwh) ang ipatutupad nilang dagdag-singil sa March billing.

Katumbas ito ng P13 taas sa mga kabahayang kumokonsumo ng 200 kwh, P19 sa konsumong 300 kwh, P25 sa konsumong 400 kwh, at P31 sa konsumong 500 kwh.

Mas malaki pa sana ang itataas pero nabawasan ito dahil sa utos na refund ng Energy Regulatory Commission at delayed na bayad sa ilang supplier.

Dahil dito, may pressure ulit na tumaas ang presyo ng kuryente sa Abril at Mayo.

"Hintayin natin, baka mag-iba naman ang situwasyon by April," sabi ni Meralco Spokesperson Joe Zaldarriaga.

Ayon naman kay Meralco utility economics head Larry Fernandez, hindi pa nila ramdam sa ngayon ang pagsipa ng presyo ng langis.

Pero hindi lang singil sa kuryente ang problema dahil may isyu rin sa supply na posibleng magdulot ng yellow at red alert, na nangangahulugang puwedeng magka-brownout sa kasagsagan ng tag-init.

Ayon sa grupong Developers of Renewable Energy for AdvanceMent, nasa projection mismo ng Department of Energy (DOE) na may yellow at red alert sa mga susunod na buwan.

"Sa DOE data, we will experience red alerts, meaning we will have brownouts in May... We are just [in] March pero napakainit ng panahon, wala pang summer, lagot tayo, tataas pa ang temperatura," sabi ni Jay Layug, presidente ng grupo.

Hagip sa panahon ng brownout ang araw ng halalan sa Mayo 9 kaya naghahanda rin ang Meralco na hindi mawalan ng kuryente ang mga critical area gaya ng polling precincts.

"'Yong mga critical election facilities... kung magkaroon man ng shortage, 'di siya mapapasama sa mawawalan ng kuryente," ani Meralco Chief Commercial Officer Ferdinand Geluz.

Langis

Samantala, lumobo pa ang average na taas ng petrolyo sa international market mula Lunes hanggang Miyerkoles. Nasa P15 na ito sa diesel, P9 sa gasolina at P11 sa gaas.

Humupa naman ang presyo ngayong Huwebes dahil sa posibilidad ng dagdag-produksiyon ng langis.

Iginiit naman ng grupong Laban Konsyumer na dapat busisiin ng gobyerno kung kailan binili ng mga oil company ang kanilang supply.

"I-identify na nila sa anong presyo nila 'yan binili. Dahil kung 'di naman 'yan binili sa presyo na itataas... huwag ipatupad ang malaking pagtaas sa presyo ng gasolina," ani Laban Konsyumer President Vic Dimagiba.

Lingguhan kasi ang palit-presyo ng mga oil company kahit higit 1 buwan ang imbentaryo nilang petrolyo.

— Ulat ni Alvin Elchico, ABS-CBN News

KAUGNAY NA ULAT:

Watch more News on iWantTFC
Bisitahin ang Patrol.PH para sa iba pang mga balita.