PatrolPH

Programang pagbili ng molnupiravir para sa maliliit na negosyo inilunsad

ABS-CBN News

Posted at Jan 12 2022 06:21 PM | Updated as of Jan 14 2022 04:56 PM

Watch more on iWantTFC

MAYNILA (UPDATE) — Tumumal ang dating ng mga kostumer sa restaurant na pinagtatrabahuhan ni Marjorie Fajardo mula nang sumipa ang mga kaso ng COVID-19. 

May ilang staff din ang establisimyento na hindi nakakapasok sa trabaho.

"May absent din ngayon dahil na-expose 'yong family nila sa positive person. 'Yong iba naman may symptoms, sila naka-quarantine," ani Fajardo.

Dahil dito, inilunsad ni Presidential Adviser for Entrepreneurship Joey Concepcion ang programang pagbili ng anti-COVID medicine na molnupiravir para sa mga maliliit na negosyo.

Ito'y para may panlaban umano ang mga manggagawang mahahawahan ng mild to moderate COVID-19.

Ayon sa Faberco, na isang supplier, dagsa agad ang mga ospital at clinic na nag-order ng gamot para magamit ng ilang kompanya.

"They will buy it for the company for their employees, sa mga empleyado nila and if somebody gets sick in their company, then they will get their company doctor to check the person and kung kailangan they endorse and then they can give molnupiravir," paliwanag ni Concepcion sa panayam ng Teleradyo. 

Aprub naman sa Department of Health ang programa ni Concepcion pero kailangan daw sundin ang panuntunan dahil hindi puwede sa lahat ng COVID patients ang molnupiravir.

"There should be a doctor guiding them on how they do this at kailangan sa high-risk individuals lang po natin maibigay ito," ani Health Spokesperson Maria Rosario Vergeire.

Ayon kay Concepcion, batid din ng employers na maraming manggagawa ang tinamaan ng COVID kaya maraming absent o work from home kaya puwede naman silang magbigay ng dagdag na leave kung kinakailangan.

"If they have exhausted their leaves, then we can give them more leaves, provided it's COVID," aniya.

Para sa Employers Confederation of the Philippines (ECOP), bukod sa dagdag na leaves ng mga kompanya, dapat kumilos din ang Social Security System (SSS), Philippine Health Insurance Corp. at Employees' Compensation Commission para ayudahan ang mga apektado ang suweldo dahil sa COVID-19.

Tumugon naman ang SSS sa pahayag ng ECOP.

Ayon sa ahensya, ang mga employed members ng SSS na tinamaan ng COVID-19 at hindi makapasok ay maaaaring makakuha ng daily cash allowance sa ilalim ng SSS Sickness Benefit Program.

"Kinakailangan na nakapaghulog siya ng hindi bababa sa tatlong buwanang kontribusyon sa loob ng huling 12 buwan bago ang semestre ng kanyang pagkakasakit o pagkapinsala ng katawan," ani SSS media affairs head Fernando Nicolas.

Dagdag ni Nicolas, ang halaga ng sickness benefit ay batay sa bilang ng araw na naaprubahan ng SSS. 

Pumalag din ang SSS sa pahayag ng ECOP na hindi agad sila tumutugon sa mga aplikasyon sa Sickness Benefit Program.

"Nais naming ipaalala sa ECOP na sa ilalim ng Republic Act 11199 o Social Security Act of 2018, ang sickness benefit ay paunang binabayaran ng employer batay sa bilang ng araw at halaga ng aprubadong sickness benefit ng kanyang empleyado. Samantala, ang employer naman ang babayaran ng SSS matapos maisumite nito ang SSS Sickness Benefit Reimbursement Application (SBRA) Form," ani Nicolas. 

— Ulat ni Alvin Elchico, ABS-CBN News
 

Bisitahin ang Patrol.PH para sa iba pang mga balita.