Eksperto may tips sa pananamit para iwas-coronavirus
Home > News

Eksperto may tips sa pananamit para iwas-coronavirus

Mula nang maipatupad ang quarantine dahil sa COVID-19 pandemic, hindi na naisuot ni Susanne Torres ang kaniyang mga pamormang damit.

Dati siyang umeekstra sa mga taping ng teleserye at commercials.

“’Pag kailangan lumabas, ang usually style ko na lang is printed na shirt na lang and shorts, since ang tsinelas ko is rubber and madali hugasan,” ani Torres.

“Ayoko na rin usually magsuot ng jacket para pagkatapos lumabas, deretso na sa washing machine,” aniya.

Gaya ni Torres, stay at home pa rin ang karamihan.

Pero sa ilang pagkakataon na kailangan naming lumabas, sinabi ng isang eksperto na makatutulong ang pagpili ng damit para hindi maikalat o masagap ang coronavirus.

Ilan sa halimbawa ng dermatologist na si Winlove Mojico ay ang pagsusuot ng button down short-sleeve polos para sa mga babae at lalaki sa halip na masikip o round-neck na t-shirt.

“Kasi mas mabilis sila tanggalin, mas mabilis sila hubarin. At the same time, hindi natin sila kailangan idikit sa ating mukha ‘pag huhubad,” ani Mojica.

Inirerekomenda rin ni Mojica ang pagsuot ng short sleeves kaysa long sleeves, at iwasan din ang pagsusuot ng mga jacket, scarf, at cardigan.

Hindi rin aniya advisable na magsuot ng mga fashionable ng personal protective equipment.

“Kasi iniisip ng tao, kailangan takpan ‘yong sarili nila para makaiwas sa virus,” ani Mojica.

“The more you put on, the more chances of winning, kasi mas marami ka tatanggalin, mas marami kakapitan virus,” aniya.

Isama na rin daw sa puwedeng dapuan ng virus ang accessories tulad ng mga bag, alahas, at mga relo.

Makabubuti rin umano na itali o i-ponytail ng mga babae ang kanilang buhok imbes na ilugay.

Mainam din ang paggamit ng mga sapatos na gawa sa goma para nahuhugasan at nadi-disinfect, ani Mojica.

Iginiit din ni Mojica na mabisa pa rin ang laging paghuhugas ng kamay.

Ipinayo rin niyang ideretso sa labahan ang mga damit na isinuot sa labas para hindi na maikalat pa kung makasagap ng coronavirus.

-- Ulat ni Angel Movido, ABS-CBN News