ABS-CBN News

What triggers money laundering probe?

Posted at | Updated as of 05/16/12 3:02 PM
Watch more shows on iWantv or TFC.tv

Nagulantang ang lahat sa dami ng sinasabing dollar account ni Chief Justice Renato Corona na nadiskubre ng Anti-Money Laundering Council at isinumite sa Ombudsman.

Pumasok sa eksena ang Anti-Money Laundering Council dahil trabaho nito ang magbantay ng mga kahina-hinalang deposito mula P500,000.

Posible kasing may elemento ng "money laundering" o sa literal na salita, "paglilinis ng perang galing sa maruming source."

“Halimbawa, ‘yung kidnapping may ransom money ‘di ba? Kapag nilipat mo sa bangko mawawala ‘yung dirty origin, parang nilalabhan mo,” sabi ni Atty. Nilo Divina, dean ng University of Sto. Tomas.

Itinatag ang council noong 2001 at pinalakas pa noong 2003 bilang paraan para supilin ang pondo ng mga terrorist organizations matapos ang trahedya ng 9/11.

Pero kahit hindi aabot ng P500,000, puwede ring silipin ng Anti-Money Laundering Council ang peso o dollar account na hindi maipaliwanag ang source, hindi kilala ang depositor o account holder, ‘di tugma sa kita ng depositor, at biniyak-biyak ng depositor para ‘di umabot ng kalahating bilyong piso kada transaksyon.

Ayon sa eksperto, dapat habulin ng AMLA ang sinumang may kahina-hinalang account.

“Kapag nalaman nila na nanggaling ito sa masamang paraan, dapat kunin ‘yun ng gobyerno para ibalik sa taong bayan,” sabi ni Divina.

Pero paglilinaw ng eksperto, hinala pa lang ang hawak ng mga kalaban ni Corona dahil wala pa namang napapatunayan sa mga dollar account.

Kaya kaabang-abang daw kung paano lulusutan ni Corona ang nadiskubreng umano’y sangkaterbang pera niya. Alvin Elchico, Patrol ng Pilipino