ABS-CBN News

Luisita farmers laud SC decision

Posted at | Updated as of 11/25/11 11:47 AM
Watch more shows on iWantv or TFC.tv

Sinariwa ng mga magsasaka ng Hacienda Luisita ang alaala ng pitong kasamahan nila na namatay noong 2004, kung saan mahigit 100 din ang nasugatan.

Pasasalamat raw nila ito sa kanila matapos maghintay ng ilang dekada sa pinaglalabang 5,000 ektarya na lupa.

Kanina, pinunit pa nila ang kanilang shares of stock sa hacienda.

“Excited na, magdidilig na nga ako sa mga halaman ko eh,” sabi ng isa sa mga magsasaka.

Bagama't masaya sila sa desisyon ng Korte Suprema, sana daw ay magkaroon rin ng hustisya para sa mga biktima ng massacre, na pinagdiwang lang ang ika-7 anibersaryo noong isang linggo.

Si Mang Adriano Caballero, namatay ang bunso sa massacre.

Hirap siyang makalimot dahil hanggang ngayon ay wala pa ring nakakasuhan.

"Ang gusto lang namin ay hustisya, eh wala kaming magawa. Parang nabalewala,” sabi ni Caballero.

Bagamat sinabi na ng Hacienda Luisita Inc. na susunod sila sa utos ng korte, may pagdududa pa rin ang ilang magsasaka.

“Nangangamba pa rin, sa loob ng anim na buwan baka kung ano pa ang mangyari,” sabi ni Gabriel Sanchez, na namatayan ng anak sa Hacienda Luisita massacre.

Kwarenta’y cinco na si Mang Willie Legado, pinaplano na rin niya ang pagreretiro sa pagtatabas ng tubo.

Suwerte na lang daw at mapapakinabangan pa niya ang makukuhang lupa.

"Sana napaaga para ‘yung ibang umaasa, mayroon sana sila bago sila namatay,” sabi ni Legado.

Buong akala ng mga magsasaka dito, magtatagal pa ang desisyon ng korte matapos itong iurong ng ilang beses.

Tila nakatulong daw sa kanila ang napabalitang girian ngayon ng Palasyo at Korte Suprema.

“Nakinabang din kami dahil kung hindi pumasok ang sigalot na away ng korte dito kay Gloria at sa Presidente, hindi mabubuksan ito eh. Sa madaling salita ay nagpapasalamat kami sa nangyaring ito at napadali ang desisyon,” sabi ni Gary Gonzales, vice chairman ng Ambala.

Tumanggi namang mag-kumento dito ang Palasyo.

Sa desisyon ng korte umaasa rin ang mga magsasaka rito na matuldukan na ang karahasan dito na naging kakambal na rin sa problema ng lupa.

Luisita farmers laud SC decision

Posted at | Updated as of 04/25/12 12:22 PM
Watch more shows on iWantv or TFC.tv

Doble-tagumpay para sa mga magsasaka ang desisyon ng Korte Suprema sa kaso ng Hacienda Luisita. Ipapamahagi ang lupa sa mga benepisyaryo at makukuha pa nila ito sa mababang halaga. Magba-Bandila si Niko Baua. Bandila, Abril 24, 2012, Martes