Mga laruang baril, kinumpiska sa Naga, Davao

ABS-CBN News

Posted at Dec 14 2016 06:36 PM

MANILA - Kahon-kahong mga laruang baril ang kinumpiska ng mga awtoridad sa magkahiwalay na operasyon sa Davao City at Naga City.

Inipon sa harap ng Naga City Hall Miyerkules ng umaga ang nasa 100 piraso ng laruang baril.

Ang iba rito ay mga replica, habang ang iba naman ay may plastic na bala.

Umaabot sa P30,000 ang halaga ng mga baril na kinumpiska ng Naga City Police Office sa pagpapatupad ng lokal na ordinansang nagbabawal sa mga ganitong laruan na maaring magamit sa krimen o kaya ay makasakit.

 

Kasama rin sa mga kinumpiska ang ilang substandard na mga ilaw at Christmas lights na nagkakahalaga ng P18,000.

Samantala, dalawang kahon ng laruang baril ang kinumpiska mula sa dalawang tindahan sa Davao City dahil sa paglabag sa anti-firecracker and pyrotechnics ordinance ng lungsod.

Ang mga nakumpiskang baril ay gumagawa ng malakas na putok at naglalabas ng usok.

Maaring tanggalan ng business permit ang dalawang tindahan kapag napatunayang nilabag nila ang nasabing ordinansa.

Payo ng mga otoridad na iwasan ang pagreregalo ng mga laruang baril sa mga bata ngayong Pasko. - ulat mula kay Bonna Pamplona at Mylce Mella, ABS-CBN News

Bisitahin ang Patrol.PH para sa iba pang mga balita.