Cardona, Rizal isinailalim sa state of calamity dahil sa water lily

ABS-CBN News

Posted at Nov 14 2017 06:44 PM

Nagdeklara ng state of calamity ang bayan ng Cardona sa Rizal dahil sa problema sa water lily.

Ayon kay Ewin Dionisio ng Cardona, Rizal Municipal Risk Reduction and Management Office, 14 na barangay sa Cardona na nasa baybayin ng Laguna Lake ang apektado ng mga halaman sa tubig.

Dagdag ni Dionisio, aabot sa mahigit 8,600 mangingisda ang hindi na makapunta sa lawa o makapangisda dahil sa kapal ng mga water lily sa lugar.

Nagkaroon na rin aniya ng kaso ng fish kill, karamihan sa mga namamatay ay isdang bangus, tilapia, at maya-maya na ikinabubuhay pa naman ng mga mangingisda.

Halos wala na ring makuhang isda sa Laguna Lake dahil sa kapal ng water lily.

Nagpapasaklolo na ang lokal na pamahalaan ng Cardona sa ilang ahensiya ng gobyerno para maalis ang mga water lily.

-- Ulat ni Henry Atuelan, ABS-CBN News

Bisitahin ang Patrol.PH para sa iba pang mga balita.