Malawakang paglilinis ng kalsada para sa ASEAN, umarangkada na

ABS-CBN News

Posted at Nov 07 2017 01:08 PM

Bilang paghahanda sa nalalapit na Association of Southeast Asian Nations (ASEAN) Summit, ikinasa ng lokal na pamahalaan ng Maynila nitong Martes ang malawakang paglilinis sa mga kalsadang dadaanan ng mga delegado.

Pinangunahan ng Manila Task Force Clean Up at Department of Public Service ng Manila City Hall ang paghahakot ng mga basura at iba pang kalat sa kahabaan ng Roxas Boulevard.

"Kailangan namin mag-araw-araw [ng linis] hanggang dumating 'yong mga bisita po natin," ani Che Borromeo, pinuno ng Manila Task Force Clean Up Head.

Nilinis rin maging ang Baywalk at mga kalsada ng Pedro Gil, Quirino Avenue, Kalaw, United Nations, Lawton at Padre Faura.

Pinaalis din ang mga tinderong nakahanay sa mga bangketa.

Ipinagbawal na rin ang pagtulog sa Baywalk.

Sa mismong ASEAN Summit, magtatalaga ang Manila City Hall ng 120 na tauhan para panatilihin ang kalinisan sa Roxas Boulevard.

-- Ulat ni Dennis Datu, ABS-CBN News

Bisitahin ang Patrol.PH para sa iba pang mga balita.