Senior citizen, di makuha ang titulo ng loteng bayad na

ABS-CBN News

Posted at Sep 02 2017 06:19 PM | Updated as of Sep 02 2017 08:02 PM

Hindi pa rin naibibigay sa isang senior citizen ang titulo ng kanyang lote bagama't nabayaran na ito nang buo noong 2014.

Tatlong taong hinulugan ni alyas Loida ang 88-square meter na lote na proyekto ng Citihomes Realty Inc. sa Villa Grande Subdivision sa Tandang Sora. 

Binuno niya ito mula sa padalang pera ng kaniyang mga anak na nasa abroad kaya naman nag-aalala na rin aniya ang mga ito. 

Ayon pa kay Loida, ilang beses na rin silang nag-follow up ngunit pinabalik-balik lamang sila, at nagbigay ng calling card ang tauhan nito ngunit hindi sinasagot ang kaniyang mga tawag.

Samantala, kinompirma ng Citihomes Realty Inc. na nasa bangko ang titulo at inaayos na nila ang paglilipat nito sa buyer.

Humihirit din sila ng dagdag na apat na buwang extension para umano maproseso ang titulo. 

Sinamahan naman ng 'Tapat Na Po' si Loida sa tanggapan ng Housing and Land Use Regulatory Board (HLURB) at napag-alamang may mga paglabag ang Citihomes kabilang na ang pagbenta sa subdivision ng lupang nabili ni Loida.

Naghain na ng reklamo si Loida at ipatatawag ng HLURB ang Citihomes para sagutin ang reklamo. 

Sumulat din ang Citihomes sa 'Tapat na Po' at sinabing sa HLURB na lamang sila direktang makikipag-usap kaugnay ng problema ni Loida. 

Tumanggi rin muna silang magbigay ng karagdagang pahayag. -- Ulat ni Alvin Elchico, ABS-CBN News

Bisitahin ang Patrol.PH para sa iba pang mga balita.