35 batang bakwit mula Marawi, bibisita sa Palasyo

Raphael Bosano, ABS-CBN News

Posted at Aug 28 2017 04:04 PM

MARAWI - Binigyan ng pagkakataon ng Joint Task Force Marawi ang 35 bata bakwit na makabiyahe sa Maynila para maranasan ang mas mapayapang kapaligiran.

Ayon sa mga awtoridad, matindi ang naranasang trauma ng mga bata bunsod ng mahigit 3 buwan ng digmaan sa lungsod. 

Malaki umano ang maitutulong ng pagbisita sa Maynila para malibang at ma-expose sa mga bagay sa labas ng conflict area. 

Pagkakataon na rin ito para may mga bagong matutuhan ang mga bata, lalo't natigil ang kanilang pag-aaral dahil sa bakbakan. 

Nakatakdang bumisita sa National Museum, The Mind Museum at Manila Ocean Park ang mga bata bilang bahagi ng educational tour.

Bibisita rin ang mga bata sa Malakanyang para makaharap si Pangulong Rodrigo Duterte. 

Sa send-off ceremony, Lunes, emosyonal ang ilang magulang dahil naalala raw nila ang pagkawasak ng kanilang bayan. 

Ang ilan sa kanila, binilinan pa ang anak na kapag nakausap ang Pangulo ay humingi ng tulong para matapos na ang gulo, lalo na ang mga pambobomba.