Ellen Adarna, sinampahan ng kasong child abuse, cybercrime

ABS-CBN News

Posted at May 15 2018 02:27 PM

 

A post shared by Ellen Adarna (@maria.elena.adarna) on

MAYNILA- Sinampahan ng kaso ang aktres na si Ellen Adarna nitong Martes ng ina ng 17-anyos na babaeng pinaghinalaan niyang kumuha ng video habang kumakain siya sa isang restoran sa Makati.

Nagtungo sa Office of the City Prosecutor sa lungsod ng Pasig si Myra Abo Santos at nagsampa ng kasong child abuse at cyber crime laban kay Adarna.

Noong Mayo 4, nag-post si Adarna ng video ng anak ni Santos kung saan kinukuhanan umano ng dalaga ng video si Adarna.

Caption pa ni Adarna sa video: "'yan ha... You know the feeling... Uncomfy noh? When you PAP us, we PAP you too! Nasa resto eh. It's a tie."

Gumamit pa ng hashtag #PaparazziMoves si Adarna sa post.

Gayunman, iginiit ng teenager sa kaniyang Twitter account na hindi nga niya napansin si Adarna at kinukuhanan niya lang ang kanilang kinakain.

Ayon naman kay Adarna, tama ang kaniyang hinala tungkol sa babaeng kostumer na kinuhanan din niya ng video.

Ilang araw matapos ang insidente, hiningian ni Santos si Adarna ng isang public apology at sinabing nasaktan ang kanilang pamilya sa ginawa ng aktres.

-may ulat ni MJ Felipe, ABS-CBN News

Bisitahin ang Patrol.PH para sa iba pang mga balita.