Mga guro sa Pangasinan, sinanay sa skills at livelihood training

Joanna D. Tacason, ABS-CBN News

Posted at May 05 2017 06:56 PM

URDANETA CITY, Pangasinan - Aabot sa 132 na guro mula sa Urdaneta Schools Division Office ang sumailalim sa Skills and Livelihood Training nitong Biyernes.

Dumaan sa food processing, commercial cooking, urban gardening, industrial arts, electronic product assembly at electrical installation ang mga guro na nagtuturo ng Edukasyong Pantahanan at Pangkabuhayan sa elementarya.

Ginawa ang skills training sa Lananpin National High School, ang unang paaralan na nagsagawa ng senior high school sa Ilocos Region at TechVoc School sa Urdaneta City.

Malaking tulong daw ito lalo na sa mga Grade 4 hanggang Grade 6 na mag-aaral upang malaman nila kung anong kurso o skills training ang kanilang tatahakin pagdating ng junior high school.

Hindi lang daw basta training ang ginawa dahil sasailalim din ang mga guro sa TESDA Qualification Assessment para malaman kung sila ba ay may kakayahang maging trainor at maaring mabigyan din ng accreditation at certification.

Paghahanda rin ito ng mga guro sa nalalapit na school year.

Bisitahin ang Patrol.PH para sa iba pang mga balita.