Sinakong pawikan, na-rescue sa Palawan

Diana Lat, ABS-CBN News

Posted at Apr 11 2018 09:28 AM

Pinakawalan rin ng awtoridad ang pawikang nasagip sa Barangay Calibangbangan sa bayan ng Linapacan sa Palawan, Abril 10, 2018. Photo courtesy of Linapacan Municipal Police Station

LINAPACAN, Palawan - Nanghihina na ang isang pawikan nang masagip ng Linapacan Municipal Police Station sa Takling Island, Barangay Calibangbangan, Martes ng umaga.

Nakasilid ito sa isang sako at inilagay sa tagong parte ng isla.

"Talagang nasa loob siya ng isang sako. Nakatago siya sa loob ng kuweba. Talagang pinag-interesan ito na i-trade," ayon kay Senior Inspector Aldrin Atienza.

Pumunta ang pulisya sa lugar matapos na may makarating sa kanilang report na talamak ang ilegal na bentahan ng pawikan sa naturang barangay.

"Through text message lang po yung information ng ating concerned citizen na talagang may nangyayari po na bentahan ng pawikan dito sa Barangay Calibangbangan, Linapacan, Palawan," ani Atienza.

Samantala, ilang metro mula sa napagkunan ng pawikan ay nahuli naman ang 2 mangingisda dahil sa pag gamit ng kompresor.

Tinitingnan ng awtoridad ang posibilidad na may kinalaman ang 2 sa sinakong pawikan.

Matapos na makipag-ugnayan sa Municipal Agriculture ay pinakawalan din ang pawikan pasado ala-una ng hapon.

"May nakausap ako actually na residente dyan. Talagang may namimili (sa) southern Palawan. Mga taga- Balabac daw. May nakausap kami buhay na pawikan ang binibili, meron naman china-chop chop na nila," sabi ni Atienza.

Hiling ng pulisya ang kooperasyon at suporta ng mga residente upang masawata ang ilegal na gawain sa lugar.

Bisitahin ang Patrol.PH para sa iba pang mga balita.