Balete sa Ilocos Norte, puno ng pera

Grace Alba, ABS-CBN News

Posted at Dec 05 2017 02:08 AM | Updated as of Dec 05 2017 10:29 PM

Tinatawag ngayon ang balete na "wishing tree." Grace Alba, ABS-CBN News

ILOCOS NORTE - Sa Pilipinas, kinatatakutan ng karamihan puno ng balete.

Pinaniniwalaan kasi na pinamamahayan ang mga ito ng multo, engkanto, at iba pang mga nakakatakot ma elemento.

Pero ang isang baleteng nasa may gilid ng national highway sa Sitio Diriki, Barangay Davila sa bayan ng Pasuquin, nilalapitan at kinagigiliwan.

Punung-puno ang balete ng mga perang papel at barya. Bukod sa peso bill, may mga foreign currency rin na nakasabit at nakaipit.

Galing ang pera sa mga taong may kanya-kanyang wish at naglagay ng anumang halaga ng pera sa puno.

Tinatawag ngayon ang balete na "wishing tree."

Kwento ni Jolly Manzano, may-ari ng restaurant na katabi ng balete, nagsimula ang paniniwala mahigit apat na buwan na ang nakalipas nang may customer na balikbayan na unang naglagay ng pera sa puno.

Paniwala daw kasi ng balikbayan ay may dalang swerte ang balete.

Pinag-usapan ng mga residente ang nangyari hanggang sa sunod-sunod ang mga lumapit at naglagay ng pera sa puno.

Isa sa mga sumubok maglagay ng pera ay si Domingo Enciso. Para sa kanya, wala naman daw masama kung susubukan at maniniwala.

"Kung sakaling ma-grant, eh di okay. Kung hindi naman, okay lang kasi wala namang masama sa wish," sabi ni Enciso.

Watch more in iWantv or TFC.tv
Bisitahin ang Patrol.PH para sa iba pang mga balita.