Lalaking halos 3 taong tumira sa puno, nakababa na

ABS-CBN News

Posted at Oct 11 2017 09:01 PM | Updated as of Oct 12 2017 01:24 AM

Kuha ni Joancris Havana Gonzales

Nakababa na ang 47-anyos na lalaking halos tatlong taong nanirahan sa tuktok ng isang puno ng niyog sa La Paz, Agusan del Sur.

Nagtulong-tulong ang mga tauhan ng lokal na pamahalaan ng La Paz sa isinagawang operasyon upang masagip si alyas "Mario."

Pinutol rin ang puno na kaniyang tinirahan, na may taas na 60 talampakan.

Pasado alas-4 ng hapon nang maibaba nang ligtas si Mario, na agad dinala sa La Paz District Hospital upang magpatingin.

Disyembre 2014 nang iwan ni Mario ang kaniyang mga kapatid, ina at dalawang anak upang manirahan sa puno 

May ilan nang nagtangkang akyatin si Mario upang hikayating bumaba subalit bigo ang mga ito dahil may bitbit itong itak. 

Ayon sa isang social worker sa La Paz, babantayan si Mario sa ospital ng kaniyang pamilya at lilipat umano sa pulisya pagkatapos suriin ng doktor.

Hindi pa malinaw ang dahilan kung bakit ililipat sa pulisya si Mario matapos magpagamot.

Balak din ng lokal na pamahalaan ng La Paz na ipasuri si Mario sa isang psychiatrist.

-- May ulat ni Charmane Awitan, ABS-CBN News

Bisitahin ang Patrol.PH para sa iba pang mga balita.