Presyo ng langis, may dagdag simula Martes

ABS-CBN News

Posted at May 28 2018 02:49 PM | Updated as of May 28 2018 11:18 PM

(UPDATED) Muling magtataas ng presyo ang mga produktong petrolyo simula Martes, ayon sa mga kompanya ng langis.

Ito ang ikatlong sunod na linggong magkakaroon ng dagdag singil sa mga produktong petrolyo.

Sa abiso ng ilang kompanya, nasa P0.65 ang dagdag-singil sa kada litro ng gasolina, P0.45 sa kada litro ng kerosene, at P0.35 naman sa kada litro ng diesel.

Mas mababa ang dagdag-singil na ipatutupad ng Eastern Petroleum na nasa P0.60 kada litro ng gasolina at P0.30 kada litro ng diesel.

Dahil naman sa sunod-sunod na pagtaas ng presyo ng langis, nag-abiso ang Phoenix Petroleum na magbibigay ito ng P2 kada litrong diskwento sa diesel at P5 kada litrong diskwento sa gasolina sa mga piling istasyon.

Nakatakda ipatupad ang diskwento mula alas-6 ng umaga hanggang alas-10 ng gabi sa mga sumusunod na petsa:

• Mega Manila - Mayo 29 hanggang 30 (20 istasyon)
• Luzon (North at South) - Hunyo 2 hanggang 3 (26 istasyon)
• Visayas - Hunyo 5 hanggang 6 (18 lugar)

Hindi pa naitatakda ng Phoenix ang petsa para sa diskwento sa Mindanao.

OIL PRICE HIKE

Shell, Flying V, Caltex, SEAOIL, Petron (Martes, 6 a.m.)
GASOLINE +P0.65/L
DIESEL +P0.35/L
KEROSENE +P0.45/L

PTT Philippines, Phoenix Petroleum, Total, Jetti Pump (Martes, 6 a.m.)
GASOLINE +P0.65/L
DIESEL +P0.35/L

Eastern Petroleum (Martes, 6 a.m.)
GASOLINE +P0.60/L
DIESEL +P0.30/L

Inamin din ng Malacañang na may krisis sa presyo ng petrolyo pero wala raw sa poder ni Pangulong Rodrigo Duterte na suspendehin ang excise tax sa langis na bahagi ng Tax Reform for Acceleration and Inclusion (TRAIN) Law.

"Tagapagpatupad lang ng batas ang presidente, ang Kongreso po ang may ganyang kapangyarihan," sabi ni Presidential spokesperson Harry Roque.

"Hindi naman permanente itong nangyayaring krisis," dagdag ni Roque.

Pupulungin ng pangulo ang Gabinete sa Hunyo 11 para pag-usapan ang mga programa kontra sa epekto ng mahal na petrolyo. -- May ulat ni Alvin Elchico, ABS-CBN News

Bisitahin ang Patrol.PH para sa iba pang mga balita.